Tag Archives: 耳筒

Sony XBA-30 三單元動鐵耳筒

標準

經歷咗差不多一年,結果又再次身痕,敗咗隻Sony XBA-30。屋企本身已經有Sennheiser PX100 同 Soundmagic PL50,其實無咩唔好,但係上癮野就係咁,有一部,跟住就會心郁想試第二部,有第二部,跟住就想試第三部。有好多人唔明,覺得,舊個部有咩唔好?壞咩?(通常呢尐都係女士問,其實好簡單,同女人買化妝品同鞋係一樣嘅,其實都係心理唔多成熟同平衡咁囉)

DSC_0271   問題起源於聽咗動鐵後,開始喜歡上動鐵嘅清澈感,慢慢睇下睇下,又試下朋友,又出去試下,響呢一年間都玩咗唔少耳筒。玩過下嘅IEM都有sennheiser IE8, UE TF10, UE 600, 700, 900, Shure SE215等等

正所謂人比人,比死人;無比較唔會覺,正如當日唔用PL50,唔會覺隻PX100 II高音暗,人聲唔清,唔聽PX100,唔覺PL50尐低音量咁少

本來都相安無事,PL50聽人,出街為主;PX100聽重beat尐嘅,屋企用多;但係越玩得多貴野,自然覺得自己兩對耳筒有尐欠缺,一有呢個諗法…出事

一路睇緊之時其實用TF10嘅朋友(重唔止一個損友)已經說我轉,咁的確,聽pop,無邊隻性價比打得贏TF10(出時二千幾,現在由於已停產所以落到千八,重好似話之前落過千五,但由於買少見少又有需求,止跌回升!),但係一路對UE新旗艦好有期望,所以一路hold住等,到UE900上年九月底公佈一路觀望香港售價,結果香港公佈價錢為3399(街價2999),價錢超出射程範圍,唯有等佢睇下跌唔跌。加上當時新出,想睇多尐review,話晒咁嘅價,已經接近我心目中貴價耳筒價位,都係睇定尐。結果試咗朋友隻TF10 (已換線),有尐心郁,跟住上海住嘅朋友又響網上買到UE900千九蚊,攪到我心大心細,只係擔心淘寶買到假野令我卻步。三月去探上海朋友試完開始又心郁,加上自己響淘寶買完幾次覺得ok,但係原來UE900開始升價,已經大多數網都上到2999人仔,即係貴過香港

既然超出射程,唯有再搵。近排上網見到有幾隻有興趣嘅,例如UE700(呢隻不嬲有興趣,不過覺得雙鐵要千一,加上覺得如果上咗一年又痕再上,倒不如直上旗艦級)同Creative Aurvana In-Ear 3 (名係3但係其實係雙鐵耳筒),搜尋期間知道Sony出咗新動鐵系列,重上網見到四鐵都係兩千左右,即刻興趣大增。

上年當我買PL50時,剛剛Sony亦出動鐵,當時都有聽過XBA1,2,覺得質素普通但係價錢就唔平,本來對新系列都係半信半疑,不過睇完唔少reviews都好似幾多好評,又加上見到大陸有網賣緊999人仔XBA30,1600 XBA40,應該係暫時最便宜四鐵耳筒。香港係1600 XBA30, 2200 XBA40,行貨都算係便宜,但係我依尐膽生毛嘅,就梗係上大陸網買運翻嚟。

決定咗一係Sony,一係UE900後,就決定出去MK舖試下,由於已經試過UE900,知道個音色係點,出去主要試Sony,加上本來諗住XBA40,想試下同部機夾唔夾到(XBA40出名揀擇,因為個阻抗太低);去到試咗差不多十分鐘就決定轉鈦買XBA30

簡單講下30同40嘅音色,30嘅音色好多人形容為平衡,而事實上就係-咁,相比PL50,30嘅低音強好多,通常我聽50會將100hz樓下推高3-5db,響30完全唔需要。低音個量其實唔係太重,如果你係聽慣Dr. Dre個類所謂Bass head,唔需要考慮,30低音量同速度都比較中等,比較下無TF10咁快,但係唔會覺得唔夠,中音無PL50咁前但係好平滑,高音間中有尐響但係亦唔係TF10咁,開咗聲一段時間覺得高音會比較settle down無咁出(雖然動鐵理論上係無得開嘅,有人覺得係心理作用)。比起UE900,應該重有尐距離,但係如果999人仔(大約千二多尐),我覺得超值,空間感好好,定位清晰,層次亦比PL50高幾皮。

XBA40呢,佢排列係一超低音,一低音,一全音加一高音(30係一低一高一全音),而聲調亦係強調佢低音,中音比較下壓,高音就明顯出尐(有尐TF10嘅取向),試完幾首歌覺得都係30聽得開心尐,比較清晰同平衡

綜合一下,XBA30中性偏暖,低音唔算好重鐵味,大陸評論有人話什至有尐動圈味,個人覺得比動圈點都快尐,只係比一尐鐵味重嘅耳筒比較,佢暖尐慢尐,中高音亦以平滑為重點,突出處在立體感。

XBA40就係V型調音,分析度同立體感其實比30更勝一籌,但係由於調音偏低音,反而無咁突出佢分析力

而家基本上耳筒不離身,高度推薦30,40就視乎個人口味

 

八月十二update:剛早幾天有機會拿朋友的ue900作較詳細的比較。兩者比較低音ue900比較出,下潛大家其實差不多,但ue900量比較多,質亦好一點,中音人聲個人覺得xba30更平滑,而高音也是xba30對比響尐,細節大家其實差不多,不過xba30明亮尐。空間感兩隻都好而ue900更勝一籌。

總體ue900的確稍勝,低音下潛力更佳,更好的空間感和定位,個人較喜歡xba30高音處理

廣告

耳筒 – SoundMagic PL50 & Sennheiser PX 100 II

標準

數月前因為用了一年多的Sony Ex310sl 正式壽終正寢,令我從新睇翻耳筒,睇翻係因為以前都有段時間鍾意睇音響(係,只係睇因為當時無錢,只可以好間中買,大部分時間都只有睇)

一路以來,我都覺得買太貴嘅耳筒出街聽係無稽嘅,條街又噪你用手機又有幾好聲呢,所以一路我都係買平嘅高端,即係入門級嘅

我從十幾年前已經係sony耳機嘅用家,由兩對當時既e848(當時算係鑑聽級),到後來ex系列先後用過三對ex300, ex310, 覺得不如找別的牌子試一下。家裡以前有用開sennheiser大耳筒,當時還小,只知道呢隻牌子好似話係勁野,錄音室都用咁話,我就梗係唔識,到啱啱出嚟做野都試過買隻HD435,但係覺得聲唔好(以前唔知有樣野叫唔夠力推,只覺得隻耳筒聲好單薄,神奇地,早排搵翻, 隻耳筒竟然重響到,不過個單元老化晒真係變咗雞聲,無計,十幾年就咁掉響度,重有聲我都覺得算係咁)。結果今次搵耳筒,用咗唔少時間睇各大小網站,結果買咗隻Sennheiser PX100 II

https://i1.wp.com/www.sennheiser.com.hk/images/stories/px1002001.jpg

決定買px100是因為本身是sennheiser fans,加上px100 I/II 有十分好的評價,而我又不想花太多錢買耳筒(原因開始說了),所以就以四百五買了。用了大約四個月,有以下評價。做工px100以入門級來說我覺得已經算很好,headband是用不鏽鋼,觸感唔錯,耳筒可以如上圖摺起,方便收藏

音色方面,px100 II比較大路,即係偏低音較強,但係並非好似beat個類重到其他咩都聽唔到個種,而係所謂比較暖嘅聲音,低音延伸唔錯,不過低音並不算實淨,反應比較慢,而響中低音(大約百幾到三百hz)相比有尐腫脹,令低音感覺唔算好清;不過以呢個價位我覺得好好,喜歡低音嘅朋友未必覺得佢夠重,但係會比較平衡。中音有少許壓抑,唔算太出,高音亦然,個耳筒係出到高音細節,但係相比收得後尐。如果要音色聽起嚟中性尐,我個人將100-300 hz稍收1-2db,從3khz開始提高,10khz後作比較大幅提高,以補翻佢frequency response本有嘅下滑

音場算闊,px100 II適合大部份流行曲同跳舞音樂,佩戴亦十分舒服,戴住聽四五個鐘唔會覺得累
https://i0.wp.com/i90.photobucket.com/albums/k240/ofey_s/PL50s.jpg
咁點解又會有pl50幾出現呢,因為對px100II,我其實無咩唔滿意,除了一樣,而呢樣係先天嘅,就係因為px100II係開放式設計,所以漏聲入聲都好嚴重,經過好多時等車要開到100%重係咩都聽唔到後,加上如果用佢做運動好容易攪到塊耳筒海綿潮濕淋淋好污糟,最重要係,身痕

PL50係隻平價動鐵耳筒, 我有幾個朋友係玩動鐵耳筒,但係由於無邊隻啱我唔好太貴嘅要求,所以雖然我買px100前有問過,結果我都無買佢地建議(包括tf10吖等等千五到三千等等)。唔清楚嘅朋友,其實入耳耳筒主要有動圈同動鐵兩種,動圈係大多數耳筒選用嘅,好處係(可以好)平,優劣好多時取決於振膜材料;而動鐵呢,大多數都係貴價耳筒,所謂in ear monitor grade嘅先會採用,好處係通常低失真,低阻抗,但係相對音域較窄,高楷iem好多會用兩個到最高楷嘅什至四個動鐵單元以覆蓋唔同音域(當然,多單元有多單元嘅難度)

香港唔多人玩平價大陸耳筒,因為cheap嘛,好多人買耳筒,係要人睇,唔係聽嘅,咁戴隻大陸野點得吖;所以好處係平!

最平嘅動鐵,應該係sony嘅xba1同ultimate ears 嘅ue600,兩者都大約要八百,兩隻我都有聽過,xba1我個人就覺得認真麻麻,ue600我都幾喜歡,如果無無見到pl50嘅話

一如以往,當我搜尋時,我都有睇好多網站,headfi係其中一個,headfi係其中一個最多用戶歷史最猶久嘅網上耳筒評論區,當然,大多數post都係用戶寫嘅,不過其中好多神人高手。當我睇下睇下,發覺響平價耳筒有隻野成日俾人讚話抵,就係soundmagic呢隻牌子,而其中佢入耳嘅旗艦型號製係pl50,咁我就花咗小小時間去旺角搵咗佢喇,盛惠三百九,雖然我見到有舖賣到四百九

先講手工,的確無得同sennheiser呢尐德國大廠比,係無得比,嚴格講,只係合格。本身線,耳筒都叫硬淨,但係當你換耳綿時,你會發覺耳綿質素麻麻,耳筒tube重可以見到膠水跡(初期產品有head-fi人換耳綿換到tube都爛埋),呢類細節問題比較多。原裝送嘅耳綿都偏小,而我有比較大耳窿,所以好難搵到貼耳嘅耳綿,而呢隻耳筒,係十分需要貼耳嘅。

如果配唔到合耳嘅耳綿呢隻耳筒係無低音,響高音,都幾刺耳嘅音色(我響amazon就見過人因為咁話佢差過收音機送嘅十蚊耳筒)

結果我晒多四十去買咗對comply嘅耳綿,雖然貴,但係的確值,我無用過咁fit嘅耳綿

用啱耳綿嘅pl50音色如下,低音仍然係弱,但係唔係出唔到,就好似px100嘅高音咁,係recessed咗,pl50其實可以出到好低嘅音,重要速度係好快嘅,但係量好細;中音好出,尤其中高音有尐主宰整個音樂嘅感覺,高音無一尐更高級動鐵咁出,但係係平滑嘅;我自己聽法會將eq校到,100 hz以下加高大約4 – 5 db,3 khz會降低1 – 2 db,10khz後加一尐以使聲音生動少少

整體講,兩隻係完全唔同嘅耳筒,px100無疑低音出好多,亦比較有impact; 如果聽一尐比較動態嘅音樂,例如rock同electronic,px100好好多;相反,pl50的確有動鐵味,就係清晰度高,尤其佢中音,如果聽民歌,吉他等等,pl50一流

相同一隻歌,我喜歡嘅張懸嘅玫瑰色的你,兩隻耳筒會有兩個味道,px100聽,開頭嘅吉他唔算好出,張嘅聲音亦唔會行得好出,到三分鐘左右首歌會由澎湃嘅鼓聲主導;用pl50聽,首歌會唔同晒,開始時嘅吉他明亮好多,每一下落手弦嘅反彈都清楚好多,張既歌聲亦出好多,到同一點時,鼓只係後面陪襯,反而響px100裡唔多出嘅鋼琴會係主力;但係去到一尐節奏明顯嘅歌,例如我聽coldplay我就會覺得pl50俾唔到個impact

結論,我諗結論就係,無一隻耳筒係玩咩都叻嘅,或者話,無一隻平價耳筒係玩咩都叻嘅,但係兩隻耳筒我覺得都無買錯,而家通常屋企用px100聽,出街就用pl50,皆大歡喜